Ráðstefnan „Raforkureikningurinn – hver hagnast, hver borgar? Hverju er hægt að breyta?“ var haldin 18. mars á vegum Samtaka sveitarfélaga á köldum svæðum. Þar var fjallað um þróun raforkukostnaðar, skiptingu raforkureikningsins og þær breytingar sem nauðsynlegar eru til að tryggja sanngjarnt og sjálfbært raforkukerfi til framtíðar.
Á ráðstefnunni kom fram að þótt raforkuverð til heimila á Íslandi sé enn hagstætt í alþjóðlegum samanburði hafi kostnaður rafkyntra heimila hækkað, einkum vegna flutnings- og dreifikostnaðar, opinberra gjalda og aukinnar fjárfestingaþarfar í innviðum. Jafnframt var bent á að laga- og regluverk kerfisins sé nú að mörgu leyti ekki í takt við breyttar aðstæður og framtíðarþarfir. Orkuskipti séu t.d. áskorun og kalli á breytt viðbragð og lausnir.
Samtök sveitarfélaga á köldum svæðum leggja áherslu á að sanngjarnt raforkukerfi sé líka byggðamál og jafnræðismál landsmanna. Íbúar og atvinnulíf á köldum svæðum eigi ekki að þurfa að búa við kerfi þar sem mismunandi gæði og aðstæður leiða til hærri byrða eða lakari stöðu en annars staðar þar sem aðgengi er að öðrum orkugjöfum. Aðgengi að raforku og kostnaður vegna hennar á að ráðast af sanngirni og jafnræði.
Niðurstaða ráðstefnunnar var skýr: Nauðsynlegt er að endurskoða umgjörð raforkukerfisins í heild, uppfæra leikreglur þess og tryggja að áframhaldandi uppbygging þess byggi á gagnsæi, sanngirni og jafnræði milli svæða.
Hér má nálgast þau erindi er voru flutt á ráðstefnunni.
Sjónarhorn Landsvirkjunar – Hörður Arnarsson, forstjóri
Sjónarhorn Landsnets – Ragna Árnadóttir, forstjóri
Sérleyfisfélög, mikilvægi þeirra og tækifæri fram undan – Gestur Pétursson, forstjóri Umhverfis- og orkustofnunar – Væntanlegt
